لا تِضيق
يَ جمالات الصبح
يَ أغاني هالفرَح
يَ نهارات اللقا
وكلّ عذب بهالدنيا بقى
يَ سعادة كلّ أحد
يعرفه قلبك . . وأحد
صار قربك . . ما بَعَد
ايه وربك . .
مِن بَعَد ؟

تدري وش معنى اللقا ؟
ألتقيني فيك وتلتقي
فيني وسط جهل الشعور ؟
يعني ألقاك طهر وشي غير
شي أحيان أحسّه
لو تدري . . على نفسي كثير
مو شي عابر مرّ بي
مو شي عابر وانتهى

من هو بس غيرك لا بغى
يكبر بـ أراضي هـ الحنين
يغافله وَصلك رباح
وينتشي منّك فرَح ؟
مَ تبعده وجه الرياح

يَ خي قلنا لك لا تضيق
ولو هو على المركب شراع
غرقت موانيه بـ سبّتك !
مو سِبّتك ..
لو سِبّتك
لو قالوا : غلاته حدّتك


لا تضيق
لو مرّه من هالدنيا انجرحت
أو لحظه فيها ما عرفت
وش هو سبب ضيقك على
هالنّاس ، أو ضيقك عليّ

يوصلني وش ودّك تقول
لو ساكت أحياناً أقول
يحقّ لك تحكي معي
وأعطيك من عمري هنَا
أو يمكن أنصاف الحلول

لا تضيق
قالوا لي مرّه لا يضيق
تضيق هالدنيا مَعه
وأقول والله لو يضيق
غصب عنها تسمعه
لا صرت يَمّه و مَعه

فيني حكي
لأشياء فيك
مَ ودي تسمعها لو سمحت
اسرح شوي ،
أصلاً حلاتك لا سرحت
طيّب سرحت ؟

طيّب عيونه قرّبي
أو بنفسي بـ أقرب لك أنا
لا تدمعي
دامه معي
لا تدمعي
دمعه لـ " فرَح " بسّ انخلق
و الباقي لأعداءه سبق

يَ هدب عينه هو تعَب ؟
طيب اهديني التعب !
و لو رسم لي في الحكي بعض العتب
هو صحّ
وأنا مخطي
و مَا يهمّ أعرف سبب

و يَ قلبه تكفى ريّحه
دامه بـ عيني مو أيّ بشر
طِيبه سحاب يلمّ ناسه
لا جَوا على نفسه غَدَا
لـ أرواحهم نسمة رشاش من الـ مَطر
مو شغلك الا تسعده
مو شغلك الا تبعده
عن كل قلب يحسده
أو يمكن إنه يتعبه

يَ عُمره . . لا يبكي حزين
يَ ليل لا يشقيه السهر
بـ ناوله صدري إلين
مَ ينتهي فيه الضجر
أحباب عُمره وش كثر !
ما عندهم قدره على
إحساس همّه لا وصَل
لقلوبهم يبكي أنين



أحكي له أنصاف الكلام
وأدري وصل صوت الكلام
من غير مَ أحكي له وصل
أحيان مَ عندي فرص
أحيان مَ أحكي وش أحسّ
إحساسي يوصل له كذا
مدري . . كذا
مَ منّه يَ ناس الأذى
ليه بس تخلّونه يضيق ؟